وبعدتي يا شمشي عن سمايا
ونسيتي إنّي نجم ..؟
ليّا أرض وليّا عرض
وليّا بين النجوم قدر...عالي
مَحَسَبتيش يوم كسوفك
وعلى قدر خوفك
إني راح أشوفك
أسيرة حروف موّالي
كنتِ فاكرة إني بعدك
راح أفضل بين النجوم ....ورا
مانتي خابرة ان الصعيدي
عمره ماكان في يوم......مَرَة
وان طبعي طبع حامي
وان غيرتي بشكل دامي
وان أبويا عاشت الأسامي
وان أمي بألف راجل
ما كَنَتش يوم تحب المسخرة
ونسيتي يا شقرا
إن ليّا في القلوب .. ناسي
وان عمري لو بعدت عن دروبي
ما اكون للحبيب...ناسي
وان الحبيب مهما يغيب
قمري... ووناسي
يكفيها السمرا تعشق هوايا
لا رسم فِ خيال ..ولا منظرة
لكن انا... بَشكرك
ان شعاعك لما وقع .. ع الحقيقة
خلاها فى العيون ... عارية
وان روحي مهما بلغت الظنون
عن العيوب ..عالية
وان الحبيبة مهما بلغ بيها الالم
لقلبي أنا .... شارية
وكفاية تكون شمسي
وأميرة حروف موّالي
خالد العطّار
ليست هناك تعليقات:
إرسال تعليق